PAYAT na AKO!!!!!!! (in my dreams)

Hindi ako makapaniwala! 6 lbs. Halos tatlong kilo. Bawas ang timbang ko ng 6 lbs sa loob lamang ng isang araw. Talagang hindi kapani-paniwala....

Heto ang aking sikreto....

Nagsimula akong manghina araw ng Huwebes. Parang patang-pata ang aking katawan. Hindi ko mapigilan ang paghikab kahit sa harap ng aking mga kliyente. Nakailang tasang kape na ako ay wala pa ring epekto. Parang hinang-hina ang katawan ko. Nang makauwi ako ng bahay ay ipinasiya ko na lamang mamahinga. Ibinili ko na lang ng McDo ang mga bata para sa hapunan nila. Nilamon ko ang french fries. Tinawagan ko si Steve at sinabihang bumili na lamang sya ng hapunan nya sa labas sapagkat wala akong balak magluto.

Nang gabi ring iyon ay halos hindi na ako mapakali. Parang may pumipiga sa bituka ko. Pati ulo ko ay parang lumulutang na rin. Ilang beses kong kinausap ang inidoro. Halos lahat ng pwedeng isuka ay naisuka ko na. Muntik pang sumama pati ang bituka, atay at balun balunan. Kinabukasan ay ipinagpasya kong lumiban sa trabaho. Hindi kaya ng powers ko. Buti na lang at nasa bahay din si Alexis, sya ang nag-asikaso sa kapatid nya. Sinusubukan kong kumain upang manumbalik ang aking lakas ngunit lalo lamang itong nagdudulot ng maigting na sakit sa aking sikmura.

Ngayon ay medyo nakakabawi na ako. Saging at ginger ale ang nakapagpabuti ng aking pakiramdam. Sana ay magtuloy-tuloy na ang paggaling ko.

Maraming salamat nga pala sa aking mga kaibigang nag-iwan ng bakas at komento sa aking nakaraang post about GowGel. Pasensya na at hindi ko kaagad nasagot....sa mga nagtatanong kung ano ang pr, hindi ito permanent resident (hehe mareng hustisya). Ito ay ang makabagbag damdaming page rank. Sa aming mga lumalagare ng paid posts, ito ay napakahalaga sapagkat kapag mataas ang pr mo, madami ding opportunities ang makukuha mo, na nangangahulugan ng anda, datung, salapi, money.